Dictionaries
Dilçilik və ədəbiyyatşünaslıq terminləri lüğəti
neoromantizm
yun. neo – yeni + fr. romantisme
XIX əsrin sonu – XX əsrin əvvəllərində realizmə və naturalizmə qarşı reaksiya olaraq yaranmış ədəbi cərəyan.
Bu cərəyanı XIX əsrin 1-ci yarısında mövcud olmuş romantizm ruhunun dirçəlməsi kimi də izah etmək olar. Lakin bununla yanaşı, neoromantik ədəbiyyatda modern ünsürlər də özünü göstərirdi. Ona görə də bəzən N.-i modernizmin ilkin mərhələsi kimi təqdim edənlər də var. N.-in formalaşmasına Nitsşe və Şopenhauerin fəlsəfəsi təkan verdi. Bu ədəbi istiqaməti səciyyələndirən əsas cəhət yeni qəhrəman – güclü xarakterə malik şəxsiyyət idi. Bu baxımdan N. çox məhsuldar və uzunsürən bir cərəyan oldu. “Ovod”un (E.L.Voyniç), “Martin İden”in (C.London), eləcə də J.Vernin, K.Doylun, H.İbsenin, K.Hamsunun əsərlərinin əsas obrazları bu günə qədər oxucuların sevimli qəhrəmanlarıdır.
Dilçilik və ədəbiyyatşünaslıq terminləri lüğəti